Xornalismo e visualización de datos

O chamado xornalismo de datos é unha das vías que percorre, independentemente do soporte, o xornalismo moderno. Esto é así porque os datos están por todas partes: Dende as estatísticas dun partido de baloncesto, ata os orzamentos públicos, pasando pola bolsa, o INEM ou o CIS, todo son datos.

Este tipo de xornalista é coma Número 5, o robot de Cortocircuito ("datos, datos, datos"), pero atópase co problema de plasmar eses datos nunha nova sen ter que recorrer a columnas de números ou a enfarragar o texto.

Así, surxe a necesidade de amosar a información dun xeito diferente, que sexa atractiva ao usuario e que informe cunha ollada rápida. Este é o obxectivo das infografías.

Agora  ben, empregar a típica gráfica de barras, de tarta ou de liñas non debería contar como tal. Hai que buscar novas formas de plasmar a información.

Este é o camiño aberto por xente coma David McCandless ou Nathan Yau. O primeiro, levando con imaxinación e creatividade (recoméndovos Information is Beautiful e The Visual Miscellaneous, por inspiradores e porque son preciosos); o segundo, dende un punto de vista máis funcional.

O libro de Yau (Visualize This: The Flowing Data Guide to Design, Visualization, and Statistics -en inglés-), explica como tratar cos datos, que ferramentas empregar e trae todo tipo de recomendacións para facer representacións ao estilo das de McCandless.

O xornalismo de datos é un dos camiños abertos con máis futuro dentro da profesión e entronca coa filosofía do movemento Open Data e coa petición dunha Lei de Transparencia Informativa.

Lectura recomendada: El periodista y los números.